ចាប់មន្ត្រីយោធាម្នាក់ ក្នុងករណីបើកល្បែងស៊ីសង
05-August-2016 | ដោយ មែន កំសត់
ខេត្តសៀមរាប ៖ មន្ត្រីយោធាម្នាក់ ដែលបើកល្បែងស៊ីសងខុសច្បាប់ ត្រូវបានកងរាជអាវុធហត្ថ ខេត្តសៀមរាប ធ្វើការឃាត់ខ្លួនបន្ទាប់ពីមានដីការបស់តុលាការឱ្យចាប់ ខណៈដែលជនសង្ស័យជាមន្ត្រីយោធាបានរត់គេចខ្លួនមួយរយៈ។ ហេតុការចាប់ខ្លួនមន្ត្រីយោធាម្នាក់នេះធ្វើឡើងនៅថ្ងៃទី៣ ខែសីហា ឆ្នាំ២០១៦ ស្ថិតនៅក្នុងផ្ទះភូមិវិហារចិន សង្កាត់ស្វាយដង្គំ ក្រុងសៀមរាប។
តាមប្រភពពីមន្ត្រីកងរាជអាវុធហត្ថខេត្តបានឱ្យដឹងនៅរសៀលថ្ងៃទី០៤ ខែសីហាឆ្នាំ២០១៦ថា មន្ត្រីយោធាម្នាក់នេះ ដែលត្រូវបានកម្លាំងមន្ទីរយុត្តិធម៌ នៃបញ្ជាការកងរាជអាវុធហត្ថខេត្តសៀមរាប ធ្វើការចាប់ខ្លួនពាក់ព័ន្ធករណីបើកកន្លែងលេងល្បែងស៊ីសងដោយខុសច្បាប់ ស្ថិតនៅភូមិវិហារចិន សង្កាត់ស្វាយដង្គំ ក្រុងសៀមរាប។
ប្រភពដដែលបានបន្ថែមថា ការចាប់ខ្លួនធ្វើឡើងនៅថ្ងៃទី៣ ខែសីហា ឆ្នាំ២០១៦នេះ ដោយអនុវត្តតាមដីការបស់តុលាការ បន្ទាប់ពីរូបគេបានរត់គេចខ្លួនបាត់អស់មួយរយៈមក។ តាមប្រភពដដែលបានបញ្ជាក់បន្ថែមថា ជនសង្ស័យមានឈ្មោះ ប៉េង ច័ន្ទសីហា ភេទប្រុស អាយុ៣៦ឆ្នាំ រស់នៅភូមិវិហារចិន សង្កាត់ស្វាយដង្គំ ក្រុងសៀមរាប មុខរបរជាមន្ត្រីយោធា។ បច្ចុប្បន្នជនសង្ស័យ ត្រូវបានកម្លាំងជំនាញបានរៀបចំកសាងសំណុំរឿងបញ្ជូនទៅកាន់សាលាដំបូង ខេត្តសៀមរាប ដើម្បីចាត់ការតាមនីតិវិធី ៕
ចំនួនអ្នកទស្សនា
- ថ្ងៃនេះ10361
- ម្សិលមិញ6261
- សប្តាហ៍នេះ28741
- ខែនេះ143891
- ឆ្នាំនេះ143891
- សរុប20586347